სამარშრუტო ტაქსის მძღოლების პროტესტიდან 16 დღის შემდეგ, მერიამ დაანონსებული კონკურსი ოფიციალურად გამოაცხადა.  ნებართვის მაძიებელთა განცხადებების მიღება, 30 ივლისიდან 1 აგვისტოს ჩათვლით მერიის შენობაში იწარმოებს. მატერიალურ-ტექნიკური მდგომარეობის შეფასება კი, 10-დან 17 აგვისტოს ჩათვლით “მეტრო” ავტოსადგურის ტერიტორიაზე მოხდება. მიკროავტობუსებით მგზავრთა გადაყვანაზე კონკურსი იმ სამარშრუტო ხაზებზე გამოცხადდა, რომლებზეც მოძრაობის ახალი სქემები და ინტერვალები საკრებულომ დაამტკიცა.

  შეგახსენებთ ბათუმში მიკროავტობუსის მძღოლები 28 ივნისს გაიფიცნენ ისინი  სამარშრუტო ხაზების ოპტიმიზაციას აპროტესტებდნენ და აცხადებდნენ, რომ მერია მათ სამსახურის გარეშე ტოვებდა. რამდენიმე დღეში, ბათუმის მერი ლაშა კომახიძე მძღოლებს დახურულ კარს მიღმა შეხვდა. მოგვიანებით კი, განაცხადა, რომ მოლაპარაკება შედგა. მერმა, 2 ივლისს აჭარის საზოგადოებრივ მაუწყებელთან განაცხადა, რომ მგზავრთა გადამყვან კომპანიებს არჩევანის სრული თავისუფლება აქვთ. მათზეა დამოკიდებული ხაზების შემცირების შემდეგ, 8 საათიან სამუშაო გრაფიკზე გადავლენ, დღე ჩაგდების პრინციპით იმუშავებენ, თუ რაიმე სხვა ალტერნატიულ საშუალებას გამოძებნიან.