რუსეთი ნატო-ს პირდაპირი ომით ემუქრება, თუ დასავლეთის ქვეყნები უკრაინას რუსეთის ტერიტორიის დასავლური შეიარაღებით დაბომბვის უფლებას მისცემენ, - ამის შესახებ გაერო-ში რუსეთის მუდმივმა წარმომადგენელმა, ვასილი ნებენზიამ გაერო-ს უსაფრთხოების საბჭოს სხდომაზე განაცხადა.

ნებენზიას ვარაუდით, უკრაინელებს, არ შეუძლიათ სამიზნეების შერჩევა და რაკეტების დაპროგრამება ასეთი თავდასხმებისთვის და ეს, მხოლოდ, „ნატო-ს სამხედრო პერსონალს“ შეუძლია.

„შეზღუდვების მოხსნის გადაწყვეტილება თუ რეალურად მიიღება ან იქნება მიღებული, ეს ნიშნავს, რომ იმ მომენტიდან ნატო-ს ქვეყნები პირდაპირ ომს იწყებენ რუსეთთან. ამ შემთხვევაში, რა თქმა უნდა, იძულებული ვიქნებით, მივიღოთ შესაბამისი გადაწყვეტილებები, რასაც მოჰყვება დასავლელი აგრესორებისთვის შედეგები. დასავლეთის ხელისუფლებები ვეღარ შეძლებენ ბრალის გადატანას კიევზე. დასავლეთმა, სავარაუდოდ, უკვე გადაწყვიტა უკრაინის შეიარაღებულ ძალებს მისცეს შორი დისტანციის იარაღის გამოყენების უფლება. ახლა კი, ჩვენ, უბრალოდ, ვაკვირდებით მისი ლეგიტიმაციის ბოლო ეტაპს, საინფორმაციო სფეროში საზოგადოებრივი აზრის თვალში“, – აღნიშნა ნებენზიამ.