2008 წელს გვქონდა ომი, გახსოვთ ვინმე, ვინც სანქციები დააწესა რუსეთის წინააღმდეგ, ჩვენი ომი ომი არ არის და უკრაინაში არსებული ომი ომია? სად არის ლოგიკა? – ამის შესახებ საქართველოს პრემიერ-მინისტრმა, ირაკლი ღარიბაშვილმა კატარის ყოველწლიური ეკონომიკური ფორუმის პანელურ დისკუსიაზე სიტყვით გამოსვლისას განაცხადა.

ღარიბაშვილის თქმით, 2008 წლის ომის შემდეგ, რუსეთთან ბიზნესს ჩვეულებრივ რეჟიმში აგრძელებდნენ აშშ და ევროპა.

„საქართველოს ეკონომიკა დაინგრევა, ჩვენ ზიანს მივაყენებთ ჩვენს ხალხს, თუ ორმხრივ ეკონომიკურ სანქციებს დავუწესებთ რუსეთს. კარგად იცით, 2008 წელს გვქონდა ჩვენ ომი, თქვენ გახსოვთ ვინმე, ვინც ომის დროს დააწესა სანქციები რუსეთის წინააღმდეგ? არავინ. მსოფლიოში არავინ იქონია სწორი რეაქცია, არც ადეკვატური რეაქცია ჰქონიათ. ამიტომ, ჩემი კითხვაა, სად არის ლოგიკა? ჩვენი ომი ომი არ არის და უკრაინაში არსებული ომი ომია? მე უნდა ვთქვა, რომ ძალიან იმედგაცრუებული ვიყავით, რომ ბიზნესი ჩვეულებრივ რეჟიმში მიმდინარეობდა რუსეთთან 2008 წლის ომის შემდეგ. იმ დამანგრეველი ომის შემდეგ, ჩვენი ქვეყნის ტერიტორიების 20 პროცენტი ოკუპირებული აქვს კვლავ რუსეთს, რუსეთმა ორი სამხედრო ბაზა ააგო ჩვენს ისტორიულ მიწაზე, რუსეთმა აღიარა ე.წ. დამოუკიდებლობა ჩვენი ისტორიული რეგიონებისა და ეს ოკუპაცია კვლავ გრძელდება.

 

ამიტომ, ჩემი კითხვა ევროპელი, ამერიკელი მეგობრებისადმი არის შემდეგი – ჩემო ძვირფასო მეგობრებო, თქვენ აგრძელებდით ბიზნესს ჩვეულებრივ რეჟიმში რუსეთთან, სანქციები არ გქონიათ დაწესებული. ევროკავშირმა რუსეთს 2022 წლამდე გადაუხადა 2,3 ტრილიონი დოლარი, არავის გაუჩერებია ბიზნესი რუსეთთან, არაფერი მომხდარა. ამ სიტუაციაში, კიდევ ერთხელ მინდა დავადასტურო, რომ მხარს ვუჭერთ უკრაინას, უკრაინელ ხალხს. გვინდა, ეს ომი რაც შეიძლება მალე დასრულდეს. ჩვენ მივუერთდით 500-ზე მეტ რეზოლუციას, განაცხადს ყველა საერთაშორისო პლატფორმაზე და სრულად შევესაბამებით საერთაშორისო სანქციებს. სახელმწიფო დეპარტამენტმა განაცხადა, რომ საქართველოს ფინანსური ინსტიტუტები, ეროვნული ბანკი სრულად შეესაბამება ფინანსურ სანქციებს.

რაც შეეხება ეკონომიკურ სანქციებს, საქართველოს სავაჭრო ბრუნვა ერთ მილიარდ დოლარზე ნაკლებია რუსეთთან. შედარებისთვის, ევროკავშირი მხოლოდ ოთხ დღეში იმას ვაჭრობს, რასაც ჩვენ მთელი წლის განმავლობაში ვვაჭრობთ. ეს სასაცილოა. ლოგიკა არ არსებობს. ეს დააზიანებდა ჩვენი ქვეყნის ეროვნულ ინტერესებს“, – განაცხადა ირაკლი ღარიბაშვილმა.

ირაკლი ღარიბაშვილის განცხადებით,  რუსეთთან პირდაპირი ფრენები არის ჩვენი ეკონომიკური ურთიერთობების შემადგენელი ნაწილი, ისევე, როგორც ევროკავშირი და ამერიკა აკეთებს ამას რუსეთთან.

მისივე შეფასებით, სამწუხაროდ, ჩვენ ვერ ვხედავთ იმის ნიშანს, რომ ეს ომი მალე დასრულდება.

„ნამდვილად ძალიან რთული დროა. ევროპას მსგავსი მასშტაბის გამოწვევა არც უნახავს მეორე მსოფლიო ომის შემდეგ და ამიტომ ეს ომი ყველას გვეხება. მაგრამ აქვე მინდა, შეგახსენოთ, რომ საქართველოს 2008 წელს ჰქონდა ომი. ჩვენ ზუსტად ვიცით, რას ნიშნავს ომი. კითხვაზე რომ გიპასუხოთ, გეგტყვით შემდეგს. შეგახსენებთ ყველას, რომ ამ ომის დაწყების დღიდან დღეს უკვე ვიცით, უკრაინის ტერიტორიის 20 პროცენტი არის ოკუპირებული რუსეთის მიერ. ეს არის დღევანდელი სტატუს კვო. რა მოხდება ხვალ, არ ვიცი, ვერ ვიტყვი. მგონი, არც არავინ იცის“, – განაცხადა ირაკლი ღარიბაშვილმა.

კითხვაზე უკვირს თუ არა, რომ უკრაინამ ამდენ ხანს გაძლო, ირაკლი ღარიბაშვილმა უპასუხა, რომ ეს ყველას უკვირს და სამწუხაროდ, არ ჩანს ნიშანი, რომ ომი მალე დასრულდება.

„მგონი, ყველას უკვირს. სამწუხაროდ, ჩვენ ვერ ვხედავთ იმის ნიშანს, რომ ეს ომი მალე დასრულდება. ეს არის პრობლემა. მაგრამ აქვე მინდა, ვთქვა, რომ ვერ ვხედავთ საკმარის ძალისხმევას საერთაშორისო თანამეგობრობის მხრიდან, სწორი ზომები განახორციელონ, რომ სამშვიდობო საუბარი წარიმართოს“, – აღნიშნა ირაკლი ღარიბაშვილმა.

მისივე განცხადებით, თუ საუბარია დამსახურებულ მიდგომაზე, საქართველო ძალიან რთულ სიტუაციაშია - გეოგრაფიის, მიმდინარე ოკუპაციის გამო.