აქონდროპლაზიის მქონე ბავშვების მშობლები უცვლელი მოთხოვნებით მთავრობის ადმინისტრაციასტან აქციას მართავენ. ისინი პრემიერ-მინისტრთან შეხვედრას, ქვეყანაში მედიკამენტ  ვოსორიტიდის შემოტანასა და დაფინანსებას ითხოვენ. მათი თქმით, ეს წამალი სასიცოცხლოდ მნიშვნელოვანია აქონდროპლაზიის სინდრომის მქონე ბავშვებისთვის და მის მიღებას მხოლოდ 14-16 წლის ასაკამდე აქვს შედეგი.   

ჯანდაცვის სამინისტროში კი აცხადებენ, რომ აქონდროპლაზიის სამკურნალო მედიკამენტის ქვეყანაში დანერგვის საკითხზე განხილვა აქტიურად მიმდინარეობს. 

უწყებაში ამბობენ, რომ მათ მუდმივი კომუნიკაცია აქვს პრეპარატის მწარმოებელთან, ექსპერტებთან და ჯანდაცვის საერთაშორისო ორგანიზაციებთან და თუ მიმდინარე წლის სექტემბრის ბოლომდე ევროკავშირის თუნდაც რამდენიმე ქვეყანაში დადასტურდება პაციენტებისთვის "ვოსორიტიდის" სახელმწიფოს მიერ უზრუნველყოფა, სამინისტრო მზადაა მედიკამენტის შემოტანა საქართველოშიც დაიწყოს.

ასევე თამარ გაბუნიას განცხადებით, უწყება მზად არის, ორგანიზება გაუწიოს და დააფინანსოს აქონდროპლაზიის მქონე ბავშვების სხვა თანმდევი დაავადებების დიაგნოსტიკა, მკურნალობა, რეაბილიტაცია და ყველა საჭირო პროცედურა, როგორც საქართველოში, ისე - საზღვარგარეთ.