პოლიციელებზე თავდასხმის ბრალდებით დაკავებულების ოჯახების აქცია

04 ივლისი 2021, 18:25 1323 ნახვა

ურეკში პოლიციის შენობაში შეჭრისა და პოლიციელის ჯანმრთელობის დაზიანების ბრალდებით დაკავებული 13 პირის გათავისუფლებას, შინაგან საქმეთა მინისტრთან და მთავარ პროკურორთან შეხვედრას ითხოვენ მათი ოჯახის წევრები და ახლობლები. დღეს მათ ურეკის პოლიციის შენობასთან აქცია გამართეს, სადაც მობილიზებული იყო ათობით პოლიციელი.

აქციის მონაწილეების თქმით მათი გამოსვლები მშვიდობიანია, ხოლო მოთხოვნები ობიექტური. ამბობენ, რომ ახალგაზრდები უკანონოდ დააკავეს და ითხოვენ სამართლიან გამოძიებას და 353-ე პრიმას მუხლის მეორე ნაწილის გადაკვალიფიცირებას, რომლითაც მათ 7-დან 11 წლამდე პატიმრობა ემუქრებათ. მათივე თქმით, ახალგაზრდების დაკავებისას ადგილი ჰქონდა პოლიციის მხრიდან ძალის გადამეტებას.

უკვე მიმართეს სააპელაციო სასამართლოს და იმედი აქვთ რომ პირველი ინსტანციის, ოზურგეთის სასამართლო გადაწყვეტილება, რომლითაც დაკავებულებს აღკვეთის ღონისძიების სახით პატიმრობა შეეფარდათ შეიცვლება.

ირინე წუწუნავა

ჟურნალისტი