ქრთამის აღების ფაქტზე შუახევის მერიის თანამშრომელი დააკავეს

13 მარტი 2021, 15:10 3717 ნახვა

მოსამართლის განჩინებით ქრთამის აღების ფაქტზე, შუახევის მუნიციპალიტეტის მერიის ეკონომიკის, არქიტექტურისა და ინფრასტრუქტურის განვითარების სამსახურის მთავარი სპეციალისტი დააკავეს.

გამოძიებით დგინდება, რომ შუახევის მერიის თანამშრომელი, ინვესტორს 4 000 ლარის სანაცვლოდ, სოფელ ზამლეთში და უჩამბის თემში მდებარე ორი ობიექტის იჯარის ხელშეკრულების გასაფორმებლად აუქციონზე გატანას და შემდგომში სამსახურებრივი მფარველობის გაწევას დაპირდა.

სუს-ის ცნობით შუახევის მუნიციპალიტეტის სოფელ ზამლეთში არსებული ობიექტი მისი უშუალო ჩართულობით გაიტანეს აუქციონზე, რომელშიც გაიმარჯვა ზემოაღნიშნულმა ინვესტორმა.

იჯარის ხელშეკრულების გაფორმების შემდეგ, შუახევის მუნიციპალიტეტის მერიის თანამშრომელმა ქრთამის სახით აიღო მოთხოვნილი თანხის ნაწილი 2 500 ლარი. გამოძიება 338-ე მუხლის პირველი ნაწილით მიმდინარეობს.

შუახევის მერის მოვალეობის შემსრულებელი დამატებით განმარტებებს ფაქტთან დაკავშირებით არ აკეთებს, ომარ ტაკიძე ამბობს რომ მხოლოდ იმ ინფორმაციას ფლობს, რომელიც სუსმა გაავრცელა.

ლენა მამულაძე
ჟურნალისტი

ამავე კატეგორიაში