გაბონის ტერიტორიულ წყლებში მდგომი გემიდან გაიტაცეს სამი მეზღვაური, მათ შორის ორი საქართველოს მოქალაქეა - საზღვაო ტრანსპორტის სააგენტო

02 მაისი 2023, 17:15 578 ნახვა

სამხრეთ აფრიკაში საქართველოს საკონსულოდან მიღებული ინფორმაციის თანახმად, 2 მაისს, ღამის საათებში, გაბონის ტერიტორიულ წყლებში, ღუზაზე მდგომი გემიდან, გაიტაცეს სამი მეზღვაური. მათ შორის, ორი საქართველოს მოქალაქეა. გემზე დარჩენილ მეზღვაურებს საფრთხე არ ემუქრებათ. ინფორმაციას საზღვაო ტრანსპორტის სააგენტო ავრცელებს.

მათივე განცხადებით, საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტო, საგარეო საქმეთა სამინისტროსთან ერთად აქტიურად მუშაობს, მათ შორის, საკრუინგო და გემთმფლობელ კომპანიებთან მეზღვაურების ტყვეობიდან გამოსახსნელად.

"სააგენტოს წარმომადგენლები უკვე დაუკავშირდნენ ოჯახის წევრებს და მიაწოდეს დეტალური ინფორმაცია.

ქართველი მეზღვაურების უსაფრთხოებიდან გამომდინარე, მოგიწოდებთ თავი შეიკავოთ დეტალებისა და რამე სახის მაიდენტიფიცირებელი ინფორმაციის საინფორმაციო საშუალებებით გავრცელებისგან"- ნათქვამია სააგენტოს მიერ გავრცელებულ განცხადებაში.

აჭარის მაუწყებელი

სოც. ადმინისტრატორი