ოპოზიციის ნაწილი ენდობა NDI-ის კვლევის შედეგებს, და ამბობენ, რომ მათ მიმართ დამოკიდებულებას განსაზღვრავს მძიმე მდგომარეობა, რომელიც ქვეყანაშია შექმნილი, შესაცვლელად კი ოპოზიცია ბერკეტების ნაკლებობას განიცდის. იზიარებენ შეხედულებას, რომ კვლევა  რეალობას ასახავს და კიდევ ერთხელ აჩვენებს პოლიტიკური ტრიბუნა არ გამოიყენონ არარეალური თემებისთვის, არამედ იმ საკითხებისთვის, რაც რეალურად აწუხებს საზოგადოებასა და სახელმწიფოს. ეროვნულ-დემოკრატიული ინსტიტუტის ანგარიში 14 ივლისიდან–15 აგვისტომდე ქვეყნის მასშტაბით ჩატარებულ საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება. გამოკითხვა ჯამში 2,104 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 2 პროცენტია. გამოკითხულთა უმეტესობისთვის ყველაზე მნიშვნელოვანი ეროვნული საკითხია სამუშაო ადგილები. კვლევის თანახმად, მოქალაქეების უმეტესი ნაწილი პოლიტიკურად გადაუწყვეტელია. NDI აღნიშნავს, რომ მოქალაქეების უმეტესმა ნაწილმა არ იცის ან არ ასახელებს იმ პარტიას, რომელიც მის შეხედულებებთან ყველაზე ახლოს დგას. თუმცა, შეკითხვაზე – რომელი პარტია დგას თქვენს შეხედულებებთან ყველაზე ახლოს, 25% "ქართულ ოცნებას" ასახელებს, 8 % "ერთიან ნაციონალურ მოძრაობას", 13% სხვა პარტიებს, 54%-მა პროცენტმა კი გასცა შემდეგი პასუხები – არც ერთი პარტია, არ ვიცი, უარი პასუხზე.