Pfizer-ს და მის პარტნიორს BioNTech-ს კორონავირუსის საწინააღმდეგო ვაქცინის ავტორიზაციაზე განაცხადი აშშ-ის სურსათისა და მედიკამენტების ადმინისტრაციაში შეიტანეს.

„ჩვენს პირველ განაცხადს ვაგზავნით აშშ-ში კორონავირუსის ვაქცინის დასარეგისტრირებლად“, - განაცხადეს კომპანია BioNTech-ში.

როგორც BioNTech-ის გენერალურმა დირექტორმა, უგურ შაჰინმა აღნიშნა, აშშ-ში გადაუდებელ შემთხვევებში პრეპარატის გამოყენებაზე განაცხადის შეტანა მნიშვნელოვანი ნაბიჯია იმისთვის, რომ ვაქცინა ხელმისაწვდომი გახდეს მსოფლიოს მოსახლეობისთვის.

დადებითი პასუხის შემთხვევაში, ვაქცინის გამოყენება აშშ-ში რისკ-ჯგუფებს შორის, უკვე წლის ბოლომდე გახდება შესაძლებელი.

Pfizer-ისა და BioNTech-ის ვაქცინის კვლევის შედეგად დადგინდა, რომ პრეპარატის ეფექტიანობა, 65 წელს გადაცილებულებს შორის, 94%-ს შეადგენს.

Pfizer-BioNTech-ი ერთადერთი Covid-19 ვაქცინაა, რომელიც ბავშვებზეც ტესტირებულია. 

კომპანიებმა ასევე დაიწყეს გარკვეული მონაცემების მიწოდება მარეგულირებლისთვის ავსტრალიაში, კანადაში, იაპონიასა და დიდ ბრიტანეთში.

ამ ეტაპზე უცნობია, FDA-ს მონაცემების შესასწავლად რა დრო დასჭირდება. ამასთან, აშშ-ის მთავრობა ვაქცინის დამტკიცებას დეკემბრის პირველ ნახევარში ელის.