ქართველ ხალხს აქვს რწმენა, რომ „ქართული ოცნება“ ის ხელისუფლებაა, რომელიც წაიყვანს ჩვენს ქვეყანას ევროინტეგრაციისკენ, მეორე მხარეს არის სრულიად ანტიევროპული პოლიტიკური ძალა – კოლექტიური „ნაცმოძრაობა“, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში გამართულ ბრიფინგზე განაცხადა.

მისივე თქმით, სიყალბეა ოპოზიციის მესიჯი, თითქოს არჩევნები არის რეფერენდუმი რუსეთსა და ევროპას შორის.

„საქართველოში ევროინტეგრაციას მხარს უჭერს 85%, „ქართულ ოცნებას“ 60%. უხეშად რომ გითხრათ, ეს ნიშნავს, რომ ასეთ ტყუილებს არავინ ჭამს, არავინ ყიდულობს საქართველოში. ის ფაქტი, რომ ევროინტეგრაციას მხარს უჭერს 85% და „ქართულ ოცნებას“ 60% მიანიშნებს იმაზე, რომ სრული სიყალბეა ოპოზიციის მესიჯი ევროპასთან და რუსეთთან დაკავშირებით, თითქოს ეს არჩევნები არის რეფერენდუმი რუსეთსა და ევროპას შორის. 85% და 60% ერთად მიანიშნებს, რომ ქართველ ხალხს აქვს რწმენა, რომ „ქართული ოცნება“ ის ხელისუფლებაა, რომელიც წაიყვანს ჩვენს ქვეყანას ევროინტეგრაციისკენ. მეორე მხარეს არის სრულიად ანტიევროპული პოლიტიკური ძალა – კოლექტიური „ნაცმოძრაობა“.

 

შეგახსენებთ, ვინ არიან ესენი – „ნაცმოძრაობა“ ცხრა წელი იყო ხელისუფლებაში, ამ ცხრა წლის განმავლობაში რაც გააკეთა, იყო ის, რომ აწამებდა ადამიანებს, გადაავსო ციხეები. ჩვენ 2.5-ჯერ შევამცირეთ ციხეებში პატიმრების რაოდენობა და ათჯერ შევამცირეთ სიკვდილიანობა ციხეებში. ვიღაცებს უნდათ, რომ ანტიევროპული პოლიტიკური ძალა „ნაცმოძრაობა“ წარმოაჩინონ ევროპულ ძალად. ყოველდღიურ რეჟიმში მიმდინარეობდა ბიზნესის ტერორი, ბიზნესის რეკეტი. 10 000 კაცს სახელმწიფოზე გადააფორმებინეს საკუთარი ქონება, ტელევიზიების მიტაცება, ომი, უბედურება, 400 ადამიანზე მეტი დაიღუპა მათ მიერ წამოწყებული ომის შედეგად, 30 000 ადამიანი იქცა დევნილად. ეს იყო ყველაზე ანტიევროპული ხელისუფლება, რაც კი საქართველოს ჰყოლია და ვიღაცები გვეუბნებიან, რომ ეს ანტიევროპული პოლიტიკური ძალა უნდა დაბრუნდეს ხელისუფლებაში, რომ ქვეყანას ჰქონდეს ევროპული პერსპექტივაო. რა დონის ტყუილია, ამას საზოგადოება ხედავს“, – განაცხადა პრემიერმა.

ირაკლი კობახიძის შეფასებით, პარტიები – „ახალი“, „ლელო“ და „გახარია საქართველოსთვის“ ანტიევროპული პოლიტიკური ძალის გაგრძელებებია.

„გვარამიას პარტია – ეს ზუსტად იგივეა, „ნაცმოძრაობის“ გაგრძელება, დანამატი. ისინიც იყვნენ „ნაცმოძრაობის“ ხელისუფლების მაღალჩინოსნები, ანუ ისინიც არიან პასუხისმგებელნი ადამიანების წამებაზე, მკვლელობაზე, ტელევიზიების მიტაცებაზე. პირადად გვარამია, სხვა ლიდერები, მელია და ა.შ. პირადად არიან ისინი პასუხისმგებელნი ამ დანაშაულებზე. ვიღაც გვეუბნება, რომ გვარამიას და სააკაშვილის პარტიები თუ არ დაბრუნდება ხელისუფლებაში, ანუ ეს ანტიევროპული ძალები, ევროპა არ ეღირსება ქვეყანასო. უნდა ხვდებოდეთ, რა დონის ტყუილთან გვაქვს საქმე. „ლელოს“ რაც შეეხება, უშუალოდ ხაზარაძე ძარცვავდა ბიზნესს ამ ანტიევროპულ ძალასთან ერთად, შესაბამისად, „ლელოც“ არის ამ ანტიევროპული პოლიტიკური ძალის გაგრძელება.

რაც შეეხება გახარიას, მას ოთხ მუნიციპალიტეტში აქვს შექმნილი კოალიცია ამ ანტიევროპულ ძალასთან, გარდა ამისა, გარე დავალებებით გახარია აკეთებდა ყველაფერს, რომ ხელოვნურად დაეპირისპირებინა ერთმანეთთან სახელმწიფო და მოქალაქეები, პოლიცია და ახალგაზრდები. ეს გააკეთა მან მესტიაში, პანკისში, „ბასიანის“ კლუბში, 20 ივნისს, სხვა ფორმით კიდევ ჩორჩანაში. ამ აგენტურაზე გვესაუბრებიან, ამ დანაშაულებრივ, ანტიევროპულ ძალებზე, რომ ანტიევროპული ხელისუფლება თუ არ დაბრუნდება, ევროპა არ გვეღირსებაო. ამ მასშტაბის ტყუილს ქართული საზოგადოება არ იყიდის“, -განაცხადა პრემიერ-მინისტრმა.