აზარტული თამაშის ბიზნესის დაბეგვრისას როგორც მოგების, ასევე ფსონების მიმართულებით განსხვავებული მოდელი იქნება შემუშავებული - ლაშა ხუციშვილი

22 ნოემბერი 2021, 14:09 772 ნახვა

ლაშა ხუციშვილის განცხადებით, აზარტული თამაშის ბიზნესის დაბეგვრისას როგორც მოგების, ასევე ფსონების მიმართულებით განსხვავებული მოდელი იქნება შემუშავებული.

მისივე თქმით, ერთი კვირის განმავლობაში წარმოადგენენ შესაბამის ხედვას, რომელიც გულისხმობს დასაბეგრი ბაზრის სრულ ცვლილებას.

“ფინანსთა სამინისტრომ ამ პროგრამასთან დაკავშირებით მიიღო დავალება და ერთი კვირის განმავლობაში წარმოვადგენთ შესაბამის ხედვას, რომელიც გულისხმობს დასაბეგრი ბაზრის სრულ ცვლილებას, როგორც რაოდენობრივ, ისე სტრუქტურულ ჭრილში და წარმოდგენილი იქნება აბსოლუტურად განსხვავებული დაბეგვრის მოდელი. ეს მოდელი გაჟღერებულ პრინციპებთან იქნება შესაბამისობაში. ასევე, იქნება გარკვეული შეზღუდვები, რომელიც გულისხმობს ერთიანი ასაკობრივი ზღვარის შემოღებას და რეკლამის აკრძალვას. ეს არის ის ჩარჩო, რომელიც არაერთ ქვეყანაშია აპრობირებული. ეს სექტორი ყველა ქვეყანაში მკაცრად რეგულირების შესაძლებლობას იძლევა.

ამ მოდელით საუბარია დასაბეგრი ბაზრის მთლიან სტრუქტურულ ცვლილებაზე. აბსოლუტურად სხვა მოდელი იქნება შემოთავაზებული საგადასახადო დაბეგვრის ყველა მიმართულებით, როგორც მოგების, ასევე ფსონების მიმართულებით. აქ შემოვა ახალი დაბეგვრის მექანიზმი ე.წ. GGR დაბეგვრა, რომელიც გულისხმობს ფსონებს შორის განსხვავებების დაბეგვრას. მნიშვნელოვანია ის, რომ აღნიშნული დაბეგვრის მოდელზე საგადასახადო ტვირთი იქნება საკმაოდ მაღალი და იმ ფორმით, რომ ეს შეამცირებს მიმზიდველობას ამ სექტორში ჩართული ადამიანების მიმართ“ , - განაცხადა ხუციშვილმა.

აჭარის მაუწყებელი
სოც. ადმინისტრატორი

ამავე კატეგორიაში