დღეიდან ქობულეთის ახალარჩეული მერი ლევან ზოიძე, უფლებამოსილების განხორციელებას ოფიციალურად შეუდგა.

ის მუნიციპალიტეტის ყოფილ მერს, მირიან ქათამაძეს შეხვდა და კაბინეტი გადმოიბარა. მოგვიანებით კი თანამშრომლებსაც გაეცნო.

ლევან ზოიძე, ამ ეტაპზე, საკადრო ცვლილებებთან დაკავშირებით არ საუბრობს. ამბობს, რომ გუნდი, რომელიც მერიაში დახვდა კომპეტენტურია.

"პროექტებს, რომლებიც ყოფილი მერის დროს დაიწყო ბოლომდე მივიყვანთ, მათ რიცხვს, ახალი სოციალური პროექტებიც შეემატება და ბიუჯეტით გათვალისწინებული პრიორიტეტები ბოლომდე შესრულდება"- აცხადებს ლევან ზოიძე.

რაც შეეხება ქობულეთის ყოფილ მერს, მირიან ქათამაძე არ აკონკრეტებს თუ სად აპირებს მუშაობის გაგრძელებას. ამბობს, რომ რჩება "ქართული ოცნების" გუნდის წევრად. საქმიანობის გაგრძელებას კი კერძო სექტორში ან ბიზნესში გეგმავს.

საარჩევნო კოდექსის თანახმად, არჩევნების შედეგების შემაჯამებელი ოქმიდან მე-11 დღეს თვითმმართველი თემის, ახალარჩეული მერი უფლებამოსილებას  ოფიციალურად შეუდგება, ხოლო ძველი მერის უფლებამოსილება წყდება.

ქობულეთის მერმა, ლევან ზოიძემ, თვითმმართველობის არჩევნებზე, ამომრჩევლის 53.45%-იანი მხარდაჭერა მოიპოვა.