კორპუსი, სადაც 8 ოქტომბრის ტრაგედია მოხდა, დემონტაჟს ექვემდებარება - ბათუმის მერია

14 ოქტომბერი 2021, 11:48 2641 ნახვა

ბათუმში, 26 მაისის ქუჩაზე მდებარე  კორპუსი, რომლის სადარბაზოც ჩამოინგრა და 9 ადამიანის სიცოცხლე იმსხვერპლა დემონტაჟს ექვემდებარება. ამის შესახებ მერიის საფინანსო-საბიუჯეტო სამსახურის უფროსმა რამდენიმე წუთის წინ განაცხადა.

ედნარ ნატარიძის განმარტებით, დემონტაჟისთვის საჭირო თანხები ბიუჯეტში აისახება.

"კეთილმოწყობის სამსახურმა დაუკვეთა სამხარაულის ეროვნულ ბიუროს შენობის შესწავლა და მათი დასკვნის შედეგად, აღნიშნული შენობა ექვემდებარება დემონტაჟს. მისი გამაგრებითი სამუშაოები ფაქტიურად შეუძლებელია.

მერიამ განახორციელა ფინანსური რესურსების მობილიზება, დღეის მდგომარეობით ეს შეადგენს დაახლოებით 500 000 ლარს და დამატებით 45 000 ლარი გამოიყოფა საპროექტო სამუშაოებისთვის. ანუ იმისთის, თუ როგორ უნდა მოხდეს ამ კორპუსის დემონტაჟი.

აღნიშნული თანხები აისახება ბიუჯეტში და ფაქტიურად დღეიდანვე შესაძლებელი იქნება სამუშაოების დაწყება.

მუშავდება საკითხი ბინების გადაცემასთან დაკავშირებით, რომელიც მოლაპარაკების კუთხით წარიმართება დაზარალებულებთან. რა გადაწყვეტილებასაც მიიღებენ მობინადრეები აღნიშნულ საკითხზე, მერიაც იმ გადაწყვეტილებას მიიღებს და შესაბამის ზომებს გაატარებს, ვგულისხმობ ან საბინაო ფონდის გამოყოფას, ან შესაბამისი სახლის მშენებლობას. ამ ეტაპზე ბინების გადაცემის საკითხი დგას"- განაცხადა ედნარ ნატარიძემ.

დღესვე ბათუმის მერიამ აჭარის მთავრობას 26 მაისის ქუჩაზე სახლის ნგრევის შედეგად დაზარალებული ოჯახებისთვის 61 ბინა გადასცა. საკითხი საკრებულოს სხდომაზე დაამტკიცეს.

ბინები ფიროსმანის, შარტავას და აღმაშენებლის ქუჩებზე მდებარეობს. დათანხმდებიან თუ არა დაზარალებულები მთავრობის შეთავაზებას უცნობია.

ჯენი კვანტალიანი
ჟურნალისტი

ამავე კატეგორიაში