საზოგადოებრივი მაუწყებლის აჭარის ტელევიზიის წინ, აქცია ამ წუთებშიც მიმდინარეობს. ტელევიზიის შენობასთან, საზოგადოების სხვადასხვა სფეროს წარმომადგენლები იმყოფებიან.

მათი მოთხოვნაა უზრუნველყოფილი იყოს მათთვის პირდაპირი საეთერო დროის დათმობა. ხოლო ის გადაცემები, რომლებიც დღეიდან, დროებით შეჩერდა, ეთერში დაბრუნდეს.

აქციის მონაწილეებს საინფორმაციო სამსახურის უფროსი შეხვდა. ნაზიბროლა ქობულაძე მათ დირექტორთან შეხვედრასა და პირდაპირ ეთერში გაშუქებაზე შეუთანხმდა.

აქციის მონაწილეების გადაწყვეტილებით, შეხვედრაზე არასამთავრობო ორგანიზაციების წარმომადგენლები შევიდნენ.

საკუთარი მოთხოვნები აქციაზე მყოფმა წარმომადგენლებმა პირადად გააცნეს ტელევიზიის დირექტორს, ვლადიმერ ტატიშვილს. დირექტორის განმარტებით, გადაცემების შეჩერების ერთადერთი მიზეზი აქციებისა და მიმდინარე მოვლენების პირდაპირ ეთერში უწყვეტ რეჟიმში გაშუქებას უკავშირება. დირექტორი მათ დაპირდა, რომ ოთხშაბათს გადაცემების აღდგენის თარიღთან დაკავშირებით მაუწყებელი განცხადებას გააკეთებს. 

შეხვედრაზე ასევე  შეთანხმდნენ, რომ 15 წუთში, აჭარის ტელევიზიის პირდაპირ ეთერში, სტუდიურ გადაცემებში, აქციის მონაწილეებს და ორგანიზატორებს საეთერო დრო დაეთმობათ.

შეგახსენებთ, რომ აჭარის ტელევიზიის მენეჯმენტის გადაწყვეტილებით, ქვეყანაში მიმდინარე მოვლენების გამო, საეთერო ბადეში მხოლოდ საინფორმაციო გამოშვებები, ახალი ამბები და პირდაპირი ეთერები გავა. ეთერში დროებით შეჩერებულია შემოქმედებითი და პოლიტიკური თოქშოუები.