უმცროსი „ბორჯღალოსნები“ მსოფლიო ჩემპიონატს ავსტრალიასთან მატჩით დაიწყებენ

28 ივნისი 2024, 14:03 224 ნახვა

ხვალიდან 19 ივლისის ჩათვლით სამხრეთ აფრიკაში მსოფლიო რაგბის 20-წლამდელთა ჩემპიონატი გაიმართება, რომელშიც მონაწილეობს საქართველოს ნაკრებიც.

უმცროსი „ბორჯღალოსნები“ ტურნირის პირველ მატჩს ავსტრალიის ნაკრების წინააღმდეგ ხვალ ჩაატარებენ, შეხვედრა ქეიფთაუნში, „ეთლონ სპორტ სთედიუმზე“ თბილისის დროით 18:30 საათზე დაიწყება.

20-წლამდელთა დონეზე ეს საქართელოსა და ავსტრალიის ნაკრებების პირველი დაპირისპირებაა.

საქართველოს ნაკრების სამწვრთნელო შტაბის მიერ გამოქვეყნებულ 23-კაციან განაცხადში ცხრა ლეგიონერია, მათგან შვიდი სასტარტო შემადგენლობაში მოხვდა. თამაზ ჭამიაშვილი, დავით მჭედლიძე, ნიკა ლომიძე, თორნიკე ღანიაშვილი, ლუკა კობაური, ლუკა ხორბალაძე და ლუკა ცირეკიძე 20-წლამდელთა ჩემპიონატზე შარშანაც თამაშობდნენ, დანარჩენებს კი ტურნირზე დებიუტი ექნებათ.

4 ივლისს უმცროსი „ბორჯღალოსნები“ ირლანდიას, 9 ივლისს კი იტალიას ეთამაშებიან.

ირაკლი დარცმელიძე

სპორტული ჟურნალისტი