საქართველოს ქალთა ნაკრები ერთა ლიგაზე თურქეთთან დამარცხდა

22 სექტემბერი 2023, 22:10 559 ნახვა

საქართველოს ქალთა ეროვნულმა ნაკრებმა ერთა ლიგის C დივიზიონის პირველი მატჩი თურქეთის წინააღმდეგ გამართა და 0:3 დამარცხდა.

პირველი ნახევარი სტუმრებმა მირაი ჯინისა და ბირგულ სადიკოღლუს გოლებით კომფორტული ანგარიშით 2:0 მოიგეს.

შესვენების შემდეგ ჩვენს ნაკრებს ანგარიშის შემცირება 54-ე წუთზე შეეძლო. ანა ჩემინავას წაქცევისთვის თურქეთის კარის მიმართულებით თერთმეტმეტრიანი დაინიშნა, რომელიც თავად დაზარალებულმა დაარტყა, თუმცა ბურთი კარს ააცილა. 71-ე წუთზე კი სტუმრებმა კიდევ ერთი ბურთის გატანა შეძლეს თავი, იაღმურ ურაზიმ გამოიჩინა და შეხვედრის საბოლოო ანგარიში 0:3 დააფიქსირა.

საქართველოს ქალთა ეროვნული ნაკრები ერთა ლიგის გათამაშების მეორე ტურის შეხვედრას 26 სექტემბერს გამართავს. ირის ანტმანის გუნდი სტუმრად ლუქსემბურგს დაუპირისპირდება.

ზურა დიასამიძე

სპორტული ჟურნალისტი