„მანჩესტერ სიტიმ“ ევროპის სუპერთასი მოიგო

17 აგვისტო 2023, 10:09 411 ნახვა

„მანჩესტერ სიტიმ“ უეფა-ს სუპერთასი მოიგო „სევილიასთან“ ურთულეს მატჩში. ევროპის ლიგის გამარჯვებული ენ-ნესირის გოლით 25-ე წუთიდან იგებდა, მაგრამ მეორე ტაიმის შუაში ინგლისელებმა კოულ პალმერის ზუსტი თავურით გაათანაბრეს ანგარიში.

ყველაფერი პენალტების სერიამ გადაწყვიტა. ბოლო, მეათე პენალტი ნემანია გუდელმა გააფუჭა და „სიტიმ“ 5:4 მოიგო. ინგლისის ჩემპიონმა პირველად მოიგო ევროპის სუპერთასი, რაც იმას ნიშნავს, რომ ბოლო 11 გათამაშებიდან 10-ში ეს პრიზი ჩემპიონთა ლიგის გამარჯვებულმა აიღო. მხოლოდ მადრიდის „ატლეტიკომ“ დაარღვია ეს ტრადიცია, როცა 2018 წელს სუპერთასისთვის „რეალი“ დაამარცხა.

პეპ გვარდიოლამ მეოთხედ მოიგო სუპერთასი და ეს სამ კლუბთან ერთად გააკეთა: „ბარსელონასთან“ 2009 და 2011, „ბაიერნთან“ 2013 წლებში და ახლა, „მანჩესტერ სიტისთან“ ერთად. სულ კი ესპანელ მწვრთნელს 36 ტიტული დაუგროვდა. ესპანელებმა ამ პრიზისთვის მეექვსედ ითამაშეს და მეხუთედ წააგეს.

ირაკლი დარცმელიძე

სპორტული ჟურნალისტი