საპროტესტო აქცია ბათუმის ნავსადგურში

31 ივლისი 2023, 14:15 780 ნახვა

"ოკუპანტებო, გაიყვანეთ თქვენი ტანკები საქართველოდან" - ამ გზავნილით დახვდნენ საკრუიზო ლაინერ მყოფ რუს ტურისტებს მოქალაქეები ბათუმში. ის, რომ საკრუიზო ლაინერი 4 დღიანი პაუზის შემდეგ ბათუმის პორტში ისევ შემოვიდოდა ინფორმაცია რამდენიმე დღით ადრე ვრცელდებოდა, ამიტომ ნავსადგურთან საპროტესტო აქცია გაცილებით ადრე, ღამის 12 საათზე დაიწყო, ვიდრე ლაინერი ნავსადგურში შემოვიდოდა.

აქციის მონაწილეების მთავარი მოთხოვნა სწორედ ეს იყო, რომ გემი, რომელზეც რუსი ტურისტები იმყოფებიან ბათუმის პორტში არ შემოსულიყო და რომ, გაეგოთ მათი ჩამოსვლა აქ არავის უხარია. ამბობენ იმასაც, რომ ყველგან დისკომფორტს შეუქმნიან, სადაც მივლენ. პროტესტის ადგილას ფრიალებს საქართველოს, უკრაინისა და ევროკავშირის დროშები.

ადგილზე რამდენჯერმე დაიძაბა ვითარება, მოხდა სიტყვიერი დაპირისპირება სამართალდამცველებთან. დაკავებულია 23 ადამიანი. მათ პოლიციელებისადმი დაუმორჩილებლობასა და წვრილმან ხულიგნობას ედავებიან.

თამუნა ხოზრევანიძე

ჟურნალისტი