არ ვაღიარებ ქართულ მართლმსაჯულებას, აქ არ ვარ იმისთვის, რომ წინასწარ დაწერილი კომედიის ნაწილი ვიყო - სააკაშვილი

29 ნოემბერი 2021, 12:38 1486 ნახვა

არ ვაღიარებ პროკურატურას და ქართულ მართლმსაჯულებას, აქ არ ვარ იმისთვის, რომ წინასწარ დაწერილი კომედიის ნაწილი ვიყო, – ამის შესახებ საქართველოს ყოფილმა პრეზიდენტმა, მიხეილ სააკაშვილმა 7 ნოემბრის საქმეზე სასამართლო პროცესის დაწყებამდე განაცხადა, რომლის საქმეს დღეს კოლეგია განიხილავს სამი მოსამართლის შემადგენლობით. 

ინფორმაციას პირველი არხი ავრცელებს, რომელიც სასამართლო პროცესს აშუქებს. 

პროცესის დაწყებისას დამსწრეებმა საქართველოს ჰიმნი ჩართეს, რასაც მოსამართლეების მხრიდან შენიშვნა მოჰყვა.

„ჰიმნის აკრძალვა? საქართველოს ჰიმნის ქვეშ, მე, რომელმაც შევქმენი ეს ჰიმნი, მე არ მინდა, ახლა კამათი“, – განაცხადა მიხეილ სააკაშვილმა.

ადვოკატმა ბექა ბასილაიამ მოსამართლეებს შუამდგომლობით მიმართა, პროცესის გაშუქების შესაძლებლობა ყველა ტელევიზიას მიეცეს.

საქალაქო სასამართლოში მიმდინარე პროცესზე ბრალდების მხარემ 7 ნოემბრის საქმეზე მიხეილ სააკაშვილის ადვოკატობიდან ნიკა გვარამიას აცილების შუამდგომლობა დააყენა.

ჯარჯი წიკლაურმა განმარტა, რომ ნიკა გვარამია 7 ნოემბრის მოვლენებში იყო ჩართული.

„ჩვენი შუამდგომლობა აცილების, ემყარება შემდეგ საფუძველს, ხსენებულ საქმეზე, რომელიც ეხებოდა 7 ნოემბრის მოვლენებს, პროკურორის სტატუსით ამ საქმეებში ჩართული იყო ნიკა გვარამია. ჩართული იყო კონტრდაზვერვის წარმომადგენლების გაგზავნაში „ტელეიმედში“. 7 ნოემბრის ღამე, როცა დარბევა ხდებოდა, გვარამია, იმჟამინდელი გენპროკურორის მოადგილე ლაცაბიძეც იმყოფებოდნენ მოდულში, საიდანაც ნიკა გვარამიამ და პროკურატურის ხელმძღვანელებმა გასცეს მითითება და გამომძიებლები სამართლებრივი საფუძვლის გარეშე „იმედში“ შევიდნენ, გამოაძევეს ჟურნალისტები. ასევე, შალვა ნათელაშვილისა და გამსახურდიას საქმეები, აგენტობას რომ აბრალებდნენ, ამ მასალებსაც გვარამია გადიოდა, ჩართული იყო, მისი ხელმძღვანელობის ქვეშ გაიმართა ეს პროცესები. ის არის ამჟამად მიხეილ სააკაშვილის ადვოკატი“, – განაცხადა ჯარჯი წიკლაურმა.

საპასუხოდ ნიკა გვარამიამ პროკურორს მიმართა.

„აზრზე არ ხარ, რას ლაპარაკობ. ყოფილი პროკურორი შენ ხარ აქ“, – განაცხადა ნიკა გვარამიამ.

 

აჭარის მაუწყებელი
სოც. ადმინისტრატორი

ამავე კატეგორიაში

#უსმინეთ!

#უყურეთ!

ამინდი