სენატორი შაჰინი, იმედი მაქვს, შეერთებულ შტატებში ერთადერთი სწორი გზავნილით დაბრუნდება, რომ საქართველოს აქვს არსებითი პროგრესი, როგორც დემოკრატიული განვითარების, ისე ადამიანის უფლებების დაცვის და ეკონომიკური ზრდის მიმართულებით, – ამის შესახებ პარლამენტის თავმჯდომარის მოადგილემ, არჩილ თალაკვაძემ განაცხადა.

„იმედი მაქვს, სენატორი შაჰინი ერთადერთი სწორი გზავნილით დაბრუნდება ამერიკის შეერთებულ შტატებში, რომ საქართველოს აქვს არსებითი პროგრესი, როგორც დემოკრატიული განვითარების, ისე ადამიანის უფლებების დაცვის და ეკონომიკური ზრდის მიმართულებით; ასევე გვაქვს თავისუფალი არჩევნები და მრავალპარტიული პარლამენტი, რომელიც საზოგადოების მიერ ჩვენი ხელისუფლების მხარდაჭერის შედეგია; თავისუფალი და მრავალფეროვანი მედია; საარჩევნო რეფორმები, რომლითაც ახლა ტარდება არჩევნები; ეს არის, რა თქმა უნდა, სტრასბურგის სასამართლოში საჩივრების არსებითი შემცირება და რეფორმები, რომლებიც ქვეყანაში ადამიანის უფლებების დაცვის კუთხით გატარდა“, – განაცხადა არჩილ თალაკვაძემ.

თალაკვაძის თქმით, საქართველოში ორმაგი ეკონომიკური ზრდაა, ხოლო მიმდინარე წელს ცხრაპროცენტიანი ზრდა დაფიქსირდა.

„რეგიონში არის ერთ – ერთი გამორჩეული. საქართველო დღეს არის უფრო თანამედროვე, თავისუფალი და ევროპული სახელმწიფო და ამას, რა თქმა უნდა, სჭირდება ობიექტური მხარდაჭერა და სამართლიანი შეფასება ჩვენი პარტნიორების მხრიდან. ჩვენ მზად ვართ, რა თქმა უნდა, განვამტკიცოთ ურთიერთობები დასავლეთთან, ჩვენს ნამდვილ მეგობრებთან და არის იგივე მოლოდინი მათგანაც, მათი მხრიდანაც. ამ ურთიერთობებში არის ძალიან ბევრი გულდასაწყვეტი მომენტი, მაგრამ, დარწმუნებული ვარ, თუ საქართველოს პროგრესი იქნება ობიექტურად შეფასებული, არანაირი კითხვის ნიშანი და არანაირი სივრცე აღარ დარჩება, ამიტომ მოველით, რომ ერთადერთი სწორი გზავნილით დაბრუნება ამერიკის შეერთებულ შტატებში, რომ საქართველოს აქვს პროგრესი“, – განაცხადა არჩილ თალაკვაძემ.