ევროპარლამენტის რეზოლუცია არის 2022 წლის პროცესის გამეორება, მომხდარიყო რევოლუცია, თუმცა ხალხზე მუქარამ არ გაჭრა და მივიღეთ კანდიდატის სტატუსი, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

მისივე თქმით, რეზოლუციაში ვიზალიბერალიზაციის გადახედვასთან დაკავშირებით არსებულ ჩანაწერს ჩალის ფასი აქვს. ამასთან, აღნიშნა, რომ ქართველი ხალხის მიმართ შანტაჟის ენა რომ არ ჭრის.

„ევროპარლამენტის გუშინდელი რეზოლუცია არის იმ პროცესის გამეორება, რაც ხდებოდა 2022 წელს. მაშინ გახსოვთ, რა იყო პროცესი. მაშინ იცოდნენ კონკრეტულმა ძალებმა, მათ შორის ამ ოდიოზურმა ევროპარლამენტარებმა, რომ ივნისში, 2022 წელს ქვეყანა ვერ მიიღებდა კანდიდატის სტატუსს და ამისთვის ქმნიდნენ ნეგატიურ ფონს საზოგადოებაში. აშინებდნენ საზოგადოებას, აშანტაჟებდნენ ქართულ საზოგადოებას. მაშინ მიიღეს სამი სხვადასხვა რეზოლუცია საქართველოსთან დაკავშირებით, სადაც საუბარი იყო, მათ შორის დამნაშავეების გათავისუფლებაზე, დამნაშავეებისთვის სისხლის სამართლებრივი დევნის შეწყვეტაზე. იქაც საუბარი იყო ბიძინა ივანიშვილის დასჯაზე. ეს იყო ერთგვარი მოსამზადებელი ფონი იმისათვის, რომ კანდიდატის სტატუსის ვერმიღების შემდეგ, საქართველოში მომხდარიყო რევოლუცია. თუმცა, გახსოვთ, რომ ფარატინა ქაღალდებად დარჩა ეს რეზოლუციები. ხალხზე მუქარამ არ გაჭრა მაშინ და ქვეყანამ, მართალია არა იმ წლის ივნისში, მაგრამ მომდევნო წელს მიიღო კანდიდატის სტატუსი.

 

ყველაფერი არის მარტივი დეჟა ვუ, არის ამ ყველაფრის გამეორება. აქაც, როგორც ჩანს ამ ოდიოზურ ევროპარლამენტარებს აქვთ გათვლა იმაზე, რომ ოქტომბერში დაიწერება, მაგალითად, კომისიის უარყოფითი დასკვნა მოლაპარაკების გახსნასთან დაკავშირებით. შესაბამისად ცდილობენ, რაღაცნაირად ჩაუფინონ ერთგვარი ნეგატიური ფონი, დააშინონ ქართული საზოგადოება. როგორც მაშინ ჰქონდა ამ რეზოლუციებს ჩალის ფასი, ახლაც ამ რეზოლუციას აქვს ჩალის ფასი. უფრო მეტიც, ჩალის ფასიც არ აქვს, ჩალაძის ფასი აქვს ამ რეზოლუციას ყველა იმ ადამიანისთვის, რომლისთვისაც მთავარია სიმართლე“, – განაცხადა კობახიძემ.

ირაკლი კობახიძს განცხადებით, ოდიოზურ ევროპარლამენტარებს ამოძრავებთ ერთადერთი მიზანი, რამენაირად გამოიწვიონ მღელვარება ქართულ საზოგადოებაში, რათა მოახერხონ ხელისუფლების ხელოვნურად შეცვლა.