საქართველოს მთავარი ამოცანაა ტერიტორიული მთლიანობის აღდგენა. ჩვენ გვავიწყებენ ამას და ლამის ბოდიშის მოხდას გვაიძულებენ აფხაზებისთვის. არაფერი ბოდიში არ გვაქვს მოსახდელი, - ამის შესახებ საქართველოს ყოფილმა პრეზიდენტმა, მიხეილ სააკაშვილმა სასამართლოში დისტანციურად ჩართვისას განაცხადა.

მიხეილ სააკაშვილის თქმით, საქართველომ უნდა აღიდგინოს ტერიტორიული მთლიანობა.

"საქართველოს სახელმწიფოს მთავარი ამოცანა არის ტერიტორიული მთლიანობის აღდგენა. ჩვენ გვავიწყებენ ამას და ლამის ბოდიშის მოხდას გვაიძულებენ აფხაზებისთვის. ნურას უკაცრავად, არაფერი ბოდიში არ გვაქვს მოსახდელი. რა თქმა უნდა, უნდა აღვიდგინოთ ჩვენი ტერიტორიული მთლიანობა, უნდა დავბრუნდეთ აფხაზეთსა და ცხინვალის რეგიონში“, - განაცხადა მიხეილ სააკაშვილმა.

მიხეილს სააკაშვილის თქმით, გამარჯვებისთვის საჭიროა ერთიანობა.

"არ მინდა, ჩავიკეტოთ რაღაც პარტიულ ფარგლებში. მინდა, ნათლად გითხრათ, რომ „ნაციონალურმა მოძრაობამ“, როგორც პარტიამ, უნდა აჩვენოს საუკეთესო, რაც შეუძლია. ჩვენ არ მივდივართ საპატიო მეორე ადგილისთვის. თუ ვინმე ემზადება სამუდამოდ ოპოზიციაში ყოფნისთვის, ამას ვერ მიიღებს. ხომ გითხრათ კალაძემ 2040 წლამდე ჩვენ უნდა ვიყოთო, ვერ მიიღებს, თუ აქეთ მხარეს, ჩვენიდან ვინმე ამისთვის არ არის მზად, იყვნენ მუდმივად ოპოზიციაში. ჩვენ არ ვემზადებით საპატიო მეორე ადგილისთვის, ჩვენ ვემზადებით პირველ ადგილზე გასასვლელად და გასამარჯვებლად. აბა, რისთვის ჩამოვედი აქ, აბა რისთვის ჩავიგდე ჩემი სიცოცხლე საფრთხეში? იმისთვის, რომ გავიმარჯვოთ. გამარჯვებისთვის ჩვენ გვჭირდება ერთიანობა. პოლიტსაბჭო, რომელიც არჩეულია, რა თქმა უნდა, ლეგიტიმურია, მაგრამ ჩვენ ვიჩქარეთ ვიღაც ადამიანების წასვლა და მინდა, ამ ადამიანებს მოვუწოდო, დაბრუნდნენ პოლიტსაბჭოში, ჩავკიდოთ ისევ ერთმანეთს ხელი, ჩავერთოთ გადაწყვეტილებების მიღებაში, რადგან ეს მნიშვნელოვანია. მე ვარ გარანტი იმისა, რომ თქვენ იქნებით ყველა მნიშვნელოვანი გადაწყვეტილების, ინიციატივის ნაწილი, რათა ერთობლივი გზით შევძლოთ წინ წასვლა. ჩვენ ბევრი რამ გვაქვს გასაკეთებელი“, - განაცხადა სააკაშვილმა.

შეგახსენებთ, რომ თბილისის საქალაქო სასამართლოში მსჯავრდებული მესამე პრეზიდენტის, მიხეილ სააკაშვილის სასამართლო პროცესი მიმდინარეობს. სხდომა ერთდროულად ორ საქმესთან დაკავშირებით იმართება.