შავი ზღვის საერთაშორისო ფესტივალი

21 სექტემბერი 2023, 14:18 801 ნახვა

შავი ზღვის საერთაშორისო ფესტივალი “ბათუმის რაფსოდია“ იწყება. “ოპერის ოქროს ხმის“ პროექტის შემდეგ, წელს ოპერის ოქროს ხმის ვოკალის აკადემიის კვირეული და გრანდიოზული მოსმენა ჩატარდება. პროექტს 130-მდე მონაწილე ჰყავს მსოფლიოს სხვადასხვა ქვეყნიდან, რომლებსაც მასტერკლასებს ცნობილი საოპერო მომღერლები ჩაუტარებენ.

მენტორების საერთაშორისო ჯგუფი უკვე ბათუმშია და დღეიდან ვორქშოპებიც იწყება.

მასტერკლასები 6 დღეს გაგრძელდება, რის შემდეგაც დაგეგმილია მოსმენა მსოფლიოს წამყვანი სააგენტოებისა და თეატრების წარმომადგენლებთან, პროდიუსერებთან.

ფესტივალის ფარგლებში, 28 სექტემბერს ჩატარდება გალა კონცერტი სომხეთის ოპერისა და ბალეტის ეროვნული თეატრის ორკესტრის თანხლებით, 1 ოქტომბერს კი პროექტს დახურავს სამი ტენორის გალა კონცერტი.

ფესტივალის დამფუძნებელი და ორგანიზატორია თამარ ივერი. ფესტივალი წელს მეორედ ტარდება, პროექტის მიზანი ახალგაზრდა მუსიკოსების მხარდაჭერაა.

ნათია ლომაძე

ჟურნალისტი