ვაკის პარკში მომხდარ ფაქტთან დაკავშირებით გამოძიება გრძელდება. შინაგან საქმეთა სამინისტროს ინფორმაციით, უკვე გამოკითხულია ასამდე პირი. კახა მურადაშვილის განცხადებით, დანიშნულია ექსპერტიზები და  გამოძიება  დოკუმენტაციას სწავლობს.

„ვაკის პარკის საქმეზე" „გრინსერვის +”-ის დირექტორის ლაშა ფურცხვანიძის და თბილისის მერიის გარემოს დაცვის საქალაქო სამსახურის უფროსის გიგა გიგაშვილის გამოკითხვა დაახლოებით 26 საათის განმავლობაში გაგრძელდა ვაკე-საბურთალოს პოლიციის მთავარ სამმართველოში.

გამოკითხვიდან გამოსვლის შემდეგ ფურცხვანიძემ ჟურნალისტებს უთხრა, რომ ვაკის პარკში სამუშაოები ყველა ნორმის დაცვით არის ჩატარებული, ყველა საბუთი არსებობს - ”ძალიან არ მინდა ვთქვა, მაგრამ ერთადერთი რაღაც წინასწარგანზრახულ ქმედებას ჰგავს” -განაცხადა კომპანიის დირექტორმა.

ამბობს, რომ შადრევანი ორი თვის განმავლობაში ტესტირების რეჟიმში მუშაობდა და ვერანაირი დარღვევა ვერ აღმოაჩინეს. 

გამოძიება ელექტროობიექტზე უსაფრთხოების წესის დარღვევის მუხლით მიმდინარეობს, რამაც ადამიანის სიცოცხლის მოსპობა გამოიწვია. დანაშაული 4-დან 7 წლამდე ვადით თავისუფლების აღკვეთას ითვალისწინებს.