ბათუმს 2500 მოსწავლეზე გათვლილი ახალი სასკოლო სივრცეები შეემატება - აჭარის მთავრობა

28 ივნისი 2022, 17:02 549 ნახვა

ბათუმს, 2500 მოსწავლეზე გათვლილი, ახალი სასკოლო სივრცეები შეემატება - ამის შესახებ ინფორმაციას აჭარის  მთავრობა ავრცელებს.

მათივე ინფორმაციით, აჭარის განათლების, კულტურისა და სპორტის სამინისტროს ბიუჯეტი 8,5 მლნ ლარით გაიზარდა. გრძელდება სტუდენტთა მხარდაჭერა, საგანმანათლებლო, სპორტული ინფრასტრუქტურის მშენებლობა-რეაბილიტაცია. 

,,ბიუჯეტის ფარგლებში დაფინანსება გაეზარდა აჭარის განათლების, კულტურისა და სპორტის სამინისტროს. ბათუმისთვის და აჭარისთვის ერთ-ერთ გამოწვევას წარმოადგენს სასკოლო სივრცეები. ვინაიდან, დემოგრაფია განაპირობებს მეტ მოთხოვნებს, ამიტომ ჩვენ უკვე ბათუმში ვიწყებთ ახალი სკოლის მშენებლობას თავდადებულის ქუჩაზე, სადაც 1000-ზე მეტ მოსწავლეს მიეცემა საშუალება თანამედროვე პირობებში ისწავლონ. ასევე, ძალიან მალე დავიწყებთ მე-16 სკოლის მშენებლობას. იქაც დაგვემატება 1500-ზე მეტი ადგილი. ასევე, ხულოში, ვაშლოვანში ძალიან მალე დაიწყება 400 მოსწავლეზე გათვლილი ახალი საგანმანათლებლო ცენტრის მშენებლობა, სადაც 10 მლნ ლარზე მეტი დაიხარჯება. ყველა ეს პროექტი რა თქმა უნდა მოგვცემს საშუალებას, რომ ჩვენ არცერთი ის გამოწვევა, რომელიც ჩვენს მოქალაქეებს, განსაკუთრებით კი აჭარის მცხოვრებლებს აწუხებს არ დაგვრჩეს ყურადღების გარეშე“ - განაცხადა თორნიკე რიჟვაძემ.

აჭარის 2022 წლის რესპუბლიკური ბიუჯეტი 6,2 %-ით გაიზარდა და 482 მლნ ლარს აღემატება. გაიზარდა როგორც სოციალური, ჯანდაცვის მიმართულებით დაგეგმილი პროგრამების, ასევე მუნიციპალიტეტებისთვის გადასაცემი ტრანსფერის მოცულობა.

აჭარის მაუწყებელი
სოც. ადმინისტრატორი

ამავე კატეგორიაში