რამდენიმე დღე რჩება ახალი მოწვევის უმაღლესი საბჭოს პირველ სხდომამდე.  პოლიტიკურ წრეებში უკვე საუბრობენ, რომ უმაღლესი საბჭოს თავმჯდომარე შესაძლოა ჯანდაცვის ყოფილი მინისტრი ნუგზარ სურმანიძე გახდეს, ვიცე-სპიკერად კი ცოტნე ანანიძე მოიაზრება, განათლების, მეცნიერების, კულტურისა და სპორტის საკითხთა კომისიას, სავარაუდოდ, განათლების მინისტრის ყოფილი მოადგილე ლადო მგალობლიშვილი უხელმძღვანელებს, საფინანსო-საბიუჯეტო კომისიას კი საგზაო დეპარტამენტის ყოფილი ხელმძღვანელი გიორგი რომანაძე. იურიდიულ საკითხთა კომისია შესაძლოა იურისტმა დავით გაბაიძემ ჩაიბაროს, ადამიანის უფლებათა დაცვის საკითხთა კომისიის თავმჯდომარედ კი, გავრცელებული ინფორმაციით რამდენიმე კანდიდატი მოიზრება. ამ ინფორმაციას ოფიციალურად არც ერთი მათგანი არ ადასტურებს, თუმცა არც გამორიცხავენ. პირველი სხდომის ჩატარებისთანავე დღის წერიგში აჭარის მთავრობის  ფორმირების საკითხი დადგება, რადგან მინისტრთა კაბინეტის წევრები ავტომატურად მოვალეობის შემსრულებლები ხდებიან. როგორც უმრავლესობის ერთ-ერთი ლიდერი ცოტნე ანანიძე აცხადებს, აჭარის მთავრობას კვლავ ზურაბ პატარაძე უხელმძღვანელებს. მინისტრების ვინაობა  ოფიციალურად ჯერ არ სახელდება, არც ის არის ცნობილი დაიწყო თუ არა კონსულტაციები.