საქართველოს ათ ქალაქსა და აჭარაში სასწავლო პროცესი 18 იანვრიდან კვლავ დისტანციურ რეჟიმში განახლდება.

დისტანციურად ისწავლიან თბილისის, ქუთაისის, რუსთავის, თელავის, ზუგდიდის, ზესტაფონის, გორის, ფოთის, მარნეულისა და გარდაბნის საჯარო და კერძო სკოლის მოსწავლეები.

სამინისტროს ინფორმაციით, სკოლები, სადაც მეორე სემესტრი საკლასო ოთახებში განახლდება, უზრუნველყოფილი იქნება პირბადეებით, უკონტაქტო თერმომეტრებით, დეზობარიერითა და ზედაპირების სადეზინფექციო სითხეებით.

საქართველოს განათლების მინისტრის მოადგილის განცხადებით, სკოლებში კორონავირუსის შემთხვევების დადასტურების შემთხვევაში პირველ სემესტრში აპრობირებული მიდგომა, წერტილოვანი შეზღუდვების შესახებ ისევ გაგრძელდება.

''საქართველოში სასწავლო პროცესის განახლებასთან ერთად, დისტანციური სწავლების მიმართულებით ერთ-ერთი მთავარი რესურსის, „ტელესკოლის“ მეორე სემესტრის საგაკვეთილო პროცესიც გაგრძელდება. საქართველოს განათლების, მეცნიერების, კულტურისა და სპორტის სამინისტროსა და საქართველოს პირველი არხის ერთობლივი საგანმანათლებლო პროექტი 18 იანვარს 9:00 საათიდან განახლდება“, - აღნიშნა ეკატერინე დგებუაძემ.