ხელვაჩაურში, სოფელ კირნათში მშენებარე ჰესის შესასვლელთან 9 სოფლის მაცხოვრებლები აქციას მართავენ

19 აპრილი 2017, 20:00 614 ნახვა

ხელვაჩაურში, სოფელ კირნათში მშენებარე ჰესის შესასვლელთან 9 სოფლის მაცხოვრებლები აქციას მართავენ. ჰესის მშენებარე კომპანია ''აჭარ ენერჯი 2007''-ს მოსახლეობა 7 თვის წინ დადებული ხელშეკრულებით გათვალისწინებულ კომპენსაციის გაცემას სთხოვს. აქციის მონაწილეები ამბობენ, რომ კომპანიამ მოქალაქეების ნაწილს კომპენსაცია მისცა, თუმცა პროცესი შეაჩერა და ადგილობრივებთან კონტაქტზე აღარ გამოდის. ისინი თანხის დროულად გაცემას ითხოვენ, წინააღმდეგ შემთხვევაში ცენტრალური გზის გადაკეტვით იმუქრებიან.

9 სოფლის მოსახლეობას, კომპენსაციის სახით, ''აჭარ ენერჯი 2007''-მა კვადრატულ მეტრში 20 ლარი უნდა გადაუხადოს. შეთანხმება კომპანიასა და მოსახლეობას შორის 7 თვის წინ შედგა, პროცესებში ჩართული იყო ხელისუფლების წარმომადგენლებიც.