"მენტალობა, რომ თუ არ უკმევ გუნდრუკს ხელისუფლებას, მტრად ხარ მიჩნეული, ტოტალიტარული აზროვნების წინაპირობაა" - ეს განცხადება საქართველოს პრეზიდენტმა გიორგი მარგველაშვილმა არასამთავრობო ორგანიზაციებს მხარდაჭერის ნიშნად გააკეთა. ინფორმაციას პრეზიდენტის ადმინისტრაცია ავრცელებს. 

უწყების ცნობით, მარგველაშვილი არასამთავრობო ორგანიზაციების წარმომადგენლებს შეხვდა, ობიექტური შეფასებებისთვის მადლობა გადაუხადა და მათ წინააღმდეგ მიმდინარე შეტევის ფონზე მხარდაჭერა გამოუცხადა. 

"შემაშფოთებელია ის ბრალდებები და რიტორიკა, რომელიც პოლიტიკოსებისგან არასამთავრობო ორგანიზაციების წარმომადგენელთა მიმართ ბოლო პერიოდის განმავლობაში ისმის. დღეს, არჩევნების წინა დღეს, მე გადავწყვიტე შეგხვდეთ იმ არასამთავრობო ორგანიზაციებს, რომლებიც აკვირდებით უმნიშვნელოვანეს მოვლენას ჩვენი დემოკრატიული პროცესის თვალსაზრისით - არჩევნებს. მინდა მადლობა გადაგიხადოთ იმ ვალდებულების შესრულებისთვის, რომელიც ქართული საზოგადოების წინაშე გაქვთ აღებული. ეს მადლობა გეხებათ პირადად თქვენ როგორც მესამე სექტორის გამორჩეულ წარმომადგენლებს, ასევე იმ ორგანიზაციებს, რომლებიც წლების განმავლობაში ახორციელებენ ამ საქმიანობას. აქვე მინდა ხაზი გავუსვა, რაც არაერთხელ უკვე აღმინიშნავს, რომ შეშფოთებული ვარ იმ რიტორიკით, რომელიც მესმის სხვადასხვა პოლიტიკოსების მხრიდან, როდესაც მიზანმიმართულად თქვენს ობიექტურ მოსაზრებებზე ან ფაქტებზე დაყრდნობით გაკეთებულ განცხადებებთან მიმართებით, ხდება თქვენზე შეტევა. მენტალობა, როდესაც ობიექტური დამკვირვებელი არის ბრალდებული იმაში, რომ ახორციელებს თავის ვალდებულებას და საზოგადოებას აწვდის ინფორმაციას დარღვევებისა და გადაცდომის შესახებ, მენტალობა, რომელიც ნებისმიერ კრიტიკას აღიქვამს თავდასხმად, მენტალობა, რომლის კონტექსტშიც, თუ არ უკმევ გუნდრუკს ხელისუფლებას ან ძლიერებს ამა ქვეყნისა, მიჩნეული ხარ მტრად, წინაპირობაა ტოტალიტარული აზროვნებისა. მინდა ხაზგასმით კიდევ ერთხელ მადლობა გითხრათ თქვენი მოღვაწეობისათვის“, - განაცხადა საქართველოს პრეზიდენტმა გიორგი მარგველაშვილმა

. არჩევნების მეორე ტურამდე ერთი დღით ადრე გამართულ შეხვედრაზე საქართველოს პრეზიდენტმა არასამთავრობო ორგანიზაციებისგან წინასაარჩევნო გარემოს შეფასებები მოისმინა.