ტატუნაშვილის საქმეზე რეზოლუციის პროექტს საგარეო კომიტეტში განიხილავენ

18 მარტი 2018, 00:00 2066 ნახვა

ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და “ოთხოზორია -ტატუნაშვილის სიის“ შესახებ რეზოლუციის პროექტს განიხილავენ ხვალ პარლამენტში. უმრავლესობის მიერ ინიცირებული რეზოლუციის პროექტის გადამუშავებული ვარიანტში, ასახულია უმცირესობის ინიციატივა “ოთხოზორია - ტატუნაშვილის სიის“ შექმნისა და აღნიშნულ სიაში შეყვანილი პირების წინააღმდეგ სანქციების დაწესების შესახებ.

რეზოლუციის პროექტის კორექტირებულ ვარიანტს უმრავლესობის ლიდერი არჩილ თალაკვაძე წარადგენს. 22 თებერვალს, საოკუპაციო რეჟიმმა საქართველოს 3 მოქალაქე - არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. 23 თებერვალს კი გავრცელდა ინფორმაცია, რომ არჩილ ტატუნაშვილი გაურკვეველ ვითარებაში გარდაიცვალა. ოსური მედიის ინფორმაციით კი, არჩილ ტატუნაშვილი ცხინვალის საავადმყოფოში გარდაიცვალა.