აჭარის მთავრობის თავმჯდომარის და 4 მინისტრის ხელფასებისა და დანამატების შესახებ, ბოლო 5 თვის მონაცემები, ნაციონალური  მოძრაობის აჭარის ორგანიზაციამ გამოითხოვა და გაასაჯაროვა. 

ბრიფინგზე, პარტიის ერთ-ერთმა სპიკერმა, რეზო ხარაზმა განაცხადა, რომ წინასაარჩევნოდ პრემია და დანამატებია სამინისტროებში გაცემული. 

გამოთხოვილი დოკუმენტების მიხედვით, აჭარის მთავრობის თავმჯდომარემ ზურაბ პატარაძემ, 5 თვეში, 28 ათას 960 ლარი აიღო ანაზღაურების სახით.

ზუსტად ერთნაირად აუნაზღაურდათ შრომა ეკონომიკის, ჯანდაცვისა და განათლების მინისტრებს, 5 თვეში, თითოეულს 23 ათას 800 ლარი დაერიცხათ. 

ყველაზე ნაკლები თანხა კი სოფლის მეურნეობის მინისტრს ერგო, მოვალეობის შემსრულებელ ავთანდილ მესხიძემ  სარგოს სახით 19 140 ლარი მიიღო.

რაც შეეხება სამინისტროებს, ნაციონალური მოძრაობის მიერ მოწოდებული დოკუმენტების მიხედვით,  5 თვის განმავლობაში, ანაზღაურების სახით აჭარის მთავრობის ყველა უწყების თანმშრომლებზე 2 მილიონ 900 ათასი ლარი დაიხარჯა.

"მთავრობის შენახვა 3 მილიონი გვიჯდება. აჭარის მთავრობა ფაროსანასავით აზის მოსახლეობას თავზე" - აცხადებს რეზო ხარაზი. 

აჭარის მთავრობაში აცხადებენ, რომ   აჭარის ა.რ მთავრობის თავმჯდომარეს და მინისტრებს, ასევე მინისტრის მოადგილეებს და დეპარტამენტების უფროსებს პრემიები არ მიუღიათ.