საქართველოს პრეზიდენტი, სალომე ზურაბიშვილი აცხადებს, რომ უნდა დაინიშნოს ახალი არჩევნები და მზად არის, ამ საკითხთან დაკავშირებით „ქართული ოცნების“ საპატიო თავმჯდომარეს, ბიძინა ივანიშვილს შეხვდეს.

აღნიშნული განცხადება ზურაბიშვილმა ორბელიანების სასახლეში ოპოზიციისა და არასამთავრობო ორგანიზაციების წარმომადგენლებთან ერთად გამართულ ბრიფინგზე გააკეთა.

ზურაბიშვილის თქმით, ზეწოლა უნდა მოხდეს ბიძინა ივანიშვილზე, რათა ახალი არჩვენები დანიშნოს. 

„დღეს ვართ შეკრებილნი კოორდინაციის ფორმატში პოლიტიკური პარტიები, არასამთავრობოები, საზოგადოების წარმომადგენლები ქუჩის აქტივისტები ორგანიზატორები თუ მონაწილეები, რათა ჩვენ გადავხედოთ, დღეს სად ვართ. ვართ ნამდვილად ახალ ეტაპზე მას შემდეგ, რაც ეუთო/ოდირმა დადო საბოლოო დასკვნა არჩევნების შესახებ. ჩვენ, ყველამ, აქ მყოფმა და საზოგადოებამ კიდევ უფრო კარგად იცის, რა მოხდა არჩევნების დროს, როგორ, რა მეთოდებით გაყალბდა. ასე რომ, არაფრის დამტკიცება არავის აღარ სჭირდებოდა. ასევე ყველამ ვიცით, რომ ეს საბოლოო დასკვნა არის მნიშვნელოვანი, რათა ჩვენმა უცხო პარტნიორებმა, რომლებიც ჯერ კიდევ ელოდებიან, რომ პოლიტიკური გადაწყვეტილება მიიღონ. სამწუხაროდ, ბატონი კობახიძისთვის არაფერს არ ცვლის ის ფაქტი, რომ ორ  წუთში გამოვიდა და თქვა, რომ ძალიან კარგია ეს დასკვნა და ჩვენ გვაძლევს ლეგიტიმაციას – ეს არის მისი სიტყვები. ჯერ არა ვართ ჩვენ საბჭოთა რეჟიმში და საბჭოთა სისტემაში, რომ მისი ნათქვამი ყველამ დაიჯეროს და ვერავინ ვერ გაიგოს, სად არის სიმართლე.

 

სიმართლე არის სულ სხვა. ეს დასკვნა არის ძალიან სერიოზული და ასახავს ყველა სწორედ იმ დარღვევებს, იმ გაყალბების ფორმებს და მეთოდებს, რაც ჩვენ, ყველამ მანამდე აღვნიშნეთ და ამას ადასტურებს ძალიან ფორმალურად დასკვნა. ეს არის ძალიან მნიშვნელოვანი თავისთავად. ფაქტი, რომ ეუთო არ იძლევა პოლიტიკურ საბოლოო შეფასებას, ესეც არის მისი პასუხისმგებლობის და მანდატის ფარგლებში, რამეთუ ამ ორგანიზაციას არა აქვს ეს მანდატი, დადოს პოლიტიკური დასკვნა და შეფასება. ის, რაც დადო არის სრულიად საკმარისი, რათა ტექნიკურად, შეფასდეს ეს არჩევნები, როგორც არჩევნები, რომელზეც ასე ამბობს, მათი პრესრელიზი, რომ საარჩევნო პროცსზე იქონია ნეგატიური შედეგი, ასევე ნეგატიური შედეგი საზოგადოებრივ ნდობაზე და ის კანონმდებლობა, რომელიც წინასწარ იყო მიღებული, იქონია ძალიან ნეგატიური გავლენა მთავარ უფლებებზე, ადამიანის უფლებებზე და ა.შ. ძალიან ბევრი არის აქ მოცემული, მე იმედი მაქვს რომ ყველამ წაიკითხა დეტალურად, იმიტომ რომ საზოგადოებამ უნდა წაიკითხოს ეს დასკვნა და ეს არის საფუძველი იმისი რომ ჩვენ გადავდივართ ახლა ყველანი ერთად ახალ ეტაპზე იმ მოთხოვნის, ძირითადი მოთხოვნის რომელსაც ჰქვია ახალი არჩევნების დანიშვნა, რამეთუ ამ პირობებში არ შეიძლება რომ იყოს სხვა პოლიტიკური გამოსავალი, სხვა ნამდვილი გამოსავალი ამ კრიზისიდან თუ არა არჩევნების დანიშვნა, ეს არის ყველა იმ ქვეყანაში რომელსაც გაუვლია ესოდენ კრიზისი, ეს არის ერთადერთი გამოსავალი, ყველამ იცის ძალიან კარგად, არ არსებობს ისტორიაში თუ პოლიტიკურ პროცესებში სხვა ვარიანტი რომ გამოხვიდე კრიზისიდან, როცა ნდობა არ არსებობს არჩევნების, როცა ნდობა არ არსებობს ხელისუფლების, როცა ხელისუფლება გადასული არის და ხელისუფლებას ბრჭყალებში ვეძახი, გადასული არის ტყუილებზე იმისთვის რომ თავისი ადგილი გაამყაროს, ეს ნიშნავს რომ ყველაფერი დამთავრებული არის და ერთადერთი გზა არის ახალი არჩევნების გზა.

 

ჩვენ დავსახეთ, მე ვიტყოდი, შეტევის სტრატეგია ყველა მიმართულებით, ეს იქნება ჩვენი უცხოელ პარტნიორებთან, შიგნით სამართლებრივად, რომ ყველაფერი ჩამოყალიბებული გვქონდეს და არ აღმოვჩნდეთ ისეთ მდგომარეობაში, რომ უცებ დაინიშნოს არჩევნები და ჩვენ მზად არ ვიყოთ. ეს ყველაფერი უნდა იყოს გათვალისწინებული. ჩვენ უნდა ვიცოდეთ, სად მივდივართ და მივდივართ მოკლე გზით. ეს არის სიახლე ამ ეუთო-ს დასკვნის შემდეგ, რომ აქ დიდი დრო აღარ არის, მით უმეტეს, რომ თვითონ „ქართული ოცნება“ არის გადასული ძალიან აჩქარებული ტემპით. ახალი კანონების მიღებას ცდილობს, რათა ძალიან ჩქარა გადაგვიყვანოს ტოტალურად რუსულ რეჟიმზე. ჩვენ ამას არ დავუშვებთ, ჩვენ უნდა ყველანაირი ზეწოლა გამოვიყენოთ შიგნიდან და გარედან, რათა ვაიძულოთ ივანიშვილი, რადგან ის არის ერთადერთი, რომელიც იღებს გადაწყვეტილებას, რომ არ ჩამოიშალოს მთლიანად მისი სისტემა, ვიდრე ჩამოიშლება მთლიანად უნდა მიიღოს გადაწყვეტილება და დაინიშნოს ახალი არჩევნები.

 

ამის კონსტიტუციური ფორმების მოფიქრება ძალიან მარტივია. ამას არ სჭირდება ბევრი ბჭობა. პირადად მე, მზად ვარ, როცა უნდა შევხვდე. მე ვიცი, გარედან ძალიან ბევრი იქნება მზად, ჩამოვიდეს და მასზე ზეწოლა განახორციელოს, უნდა დაინიშნოს ახალი არჩევნები და უნდა დაინიშნოს სასწრაფოდ. ამისთვის მე ასევე ხვალ ვიქნები პარლამენტის წინ ხალხთან ერთად, ცხრა საათზე გამოვალ სიტყვით, რათა ჩვენ,  ყველანი ერთად, არამხოლოდ ვინც აქ არის და ვინც მუშაობს უშუალოდ ამ საკითხებზე, არამედ იმ ადამიანებთან, რომლებიც ამდენი დღეა, მართავენ სხვადასხვა ფორმით, სხვადასხვა ადგილას პროტესტს და რომლებმაც გაიტანეს ეს პროტესტი საზღვრების გარეთ, მათთან ერთად კიდევ ერთხელ დავაფოქსიროთ, რომ არჩევნების გარეშე არაფერი არ იქნება. ეს არის მთლიანად, მთელი ქვეყნის მოთხოვნა. ასე რომ, ხვალ მე დარწმუნებული ვარ, რომ ვიქნებით კიდევ უფრო მეტი, ვიდრე ვართ ყოველდღიურად“, – განაცხადა სალომე ზურაბიშვილმა.