მთავარი საფიქრალი და საზრუნავი დღე ის კი არ არის, ავირჩიოთ თუ არა ევროპული გზა, არამედ როგორ გავიაროთ ის. ევროპული გზა უნდა გავიაროთ ისე, რომ მას არ შეეწიროს ჩვენი დამოუკიდებლობა და თვითმყოფადობა, ჩვენი სახელმწიფო და ხალხი არ დადგეს განადგურების წინაშე, – ამის შესახებ „ქართული ოცნების“ პოლიტიკური საბჭოს წევრმა, პარლამენტის თავმჯდომარე, შალვა პაპუაშვილმა „ქართული ოცნების“ საარჩევნო კამპანიის რეგიონულ ღონისძიებაზე, ოზურგეთში, სიტყვით გამოსვლის დროს განაცხადა.

„ჩვენ დღეს შევიკრიბეთ საქართველოს იმ კუთხეში, სადაც ოდითგანვე ყველაზე მეტად აფასებდნენ მშვიდობას, როგორც ეროვნული გადარჩენის და სახელმწიფოებრივი განვითარების ქვაკუთხედს. გურულებს ყველაზე კარგად ესმით, რომ პოლიტიკა, მათ შორის საერთაშორისო, გლობალური პოლიტიკა, ყველა მოქალაქის საქმეა, რადგან ჩვენი ქვეყანა მხოლოდ ჩვენი საპატრონოა. ზოგიერთისგან გვესმის, რომ დღეს საქართველო საგარეო-პოლიტიკურ გზაჯვარედინზეა. სინამდვილეში, ჩვენმა ხალხმა და „ქართულმა ოცნებამ“ დიდი ხანია მისი საგარეო-პოლიტიკური არჩევანი მკაფიოდ გამოხატა. ეს არის ევროპული გზა, რომელიც ჩვენი ხალხის ღირებულებებს შეესაბამება და მყარად არის გამჯდარი ჩვენს სტრატეგიულ ხედვაში, ეროვნულ გენში და ყოველდღიურობაში. ამიტომ, დღეს, მთავარი საფიქრალი და საზრუნავი ის კი არ არის, ავირჩიოთ თუ არა ევროპული გზა, არამედ როგორ გავიაროთ ის. ევროპული გზა უნდა გავიაროთ ისე, რომ მას არ შეეწიროს ჩვენი დამოუკიდებლობა და თვითმყოფადობა, ჩვენი სახელმწიფო და ხალხი არ დადგეს განადგურების წინაშე, არ მოგვიწიოს ასკინკილით ხტუნვა, ეროვნული ღირსების უარყოფა და საკუთარი თავის დამცირება“, – განაცხადა შალვა პაპუაშვილმა.

პაპუაშვილის თქმით, ხელისუფლების ამოცანაა, გლობალური პოლიტიკური ძალების დაპირისპირების ფონზე, ქვეყანა დაუზიანებლად, გაუნადგურებლად, ღირსეულად მიიყვანოს მშვიდობისა და კეთილდღეობის ნავსაყუდელში.

„ჩვენი ამოცანაა, გლობალური პოლიტიკური ძალების დაპირისპირების ფონზე, ჩვენი ქვეყანა დაუზიანებლად, გაუნადგურებლად, ღირსეულად მივიყვანოთ მშვიდობისა და კეთილდღეობის ნავსაყუდელში. ყველა, ვინც ამის წინააღმდეგია, საქართველოს მტერია, შინ და გარეთ. ბოლო ორ წელიწადში კარგად დავინახეთ, ნებსით თუ უნებლიედ, როგორ უბიძგებდნენ საქართველოს დამღუპველი და გამანადგურებელი ომისკენ. როგორ უცებ დაივიწყეს რუსეთის მიმართ „სტრატეგიული მოთმინების“ პოლიტიკა, რომელსაც მანამდე დაჟინებით გვირჩევდნენ და ყოვლად გაუმართლებელი, დაუსაბუთებელი და დამღუპველი სამხედრო-პოლიტიკური ესკალაცია მოითხოვეს ჩვენი ხელისუფლებისგან“,- განაცხადა შალვა პაპუაშვილმა.

მისი თქმით, რუსეთის უკრაინაში შეჭრის პირველივე დღიდან ოპოზიციის წევრები მოითხოვდნენ პოლიტიკური და ეკონომიკური დაპირისპირების ესკალაციას

„რუსეთის უკრაინაში შეჭრის პირველივე დღიდან ისინი მოითხოვდნენ პოლიტიკური და ეკონომიკური დაპირისპირების ესკალაციას. და დღესაც ეს არის მათი მთავარი დაპირება: მოხალისეების ფრონტზე გაგზავნა, საზღვრების ჩაკეტვა, ფრენების აკრძალვა, ვიზების შემოღება, სანქციების დაწესება და ვაჭრობის გაჩერება. ჩვენ ხომ ყველამ კარგად ვიცით, რომ ერთი გრამი ძალაუფლებაც რომ ჩაიგდონ ხელში, მეორე დღესვე ამ ყველაფერს გააკეთებენ. რა არის ეს, თუ არა დიდი გეოპოლიტიკური შეცდომა და, უფრო მეტიც, ქვეყნის პირდაპირი ღალატი, რომლის ბოლო მხოლოდ ერთია – ომი, ნგრევა, სიკვდილი, ჩვენი სამშობლოს, ოჯახების და მომავლის განადგურება. და რისთვის ეს ყველაფერი? დაღუპო შენი ხალხი, რომ უცხოელმა ტაში დაგიკრას? გასწირო შენი ქვეყანა ნგრევისთვის, რომ წითელი ხალიჩა დაგიგონ? არც კი ფიქრობენ რა მომავლისთვის სწირავენ საკუთარ შვილებს, მეგობრებს, მეზობლებს. ვიღა გამოგვხედავს მიწასთან გასწორებულს და დანგრეულს? ვიღას დასჭირდები სიღატაკესა და უიმედობაში ჩაძირული? ვის უნდა მძიმე ტვირთად ისეთი ქვეყანა, რომელსაც აღარც აწმყო აქვს და არც მომავალი? ასეთი დანგრეული ქვეყანა არც ევროკავშირს დააინტერესებს და არც ნატო-ს“, – განაცხადა შალვა პაპუაშვილმა.

პაპუაშვილის განცხადებით, ნებისმიერი ცივილიზებული თანამეგობრობისთვის ისეთი სახელმწიფოა მისაღები, რომელიც მტკიცედ, ორ ფეხზე დგას ეკონომიკურად, პოლიტიკურად, უსაფრთხოებით, ღირსებით.

„ქვეყანა, რომელიც პარტნიორებს გვერდში უდგას საერთაშორისო მისიებში. გაერთიანებული ქვეყანა, რომელიც პატივს სცემს მეგობრებს და თავადაც იცის საკუთარი ფასი. სწორედ ასეთ ქვეყანას ვაშენებთ ჩვენ. და სწორედ ამას ებრძვის ოპოზიცია. ბოლო წლების ქაოსის და ომის ქარცეცხლის რკალში, ჩვენი ქვეყანა მხოლოდ ერთმა რამემ გადაარჩინა: ეს იყო ჩვენი ბრძენი ხალხი და მისი ხელისუფლება, რომელიც დამოუკიდებლად, მხოლოდ ეროვნული ინტერესებით იღებდა გადაწყვეტილებას. სწორედ დამოუკიდებლობა და ეროვნული ინტერესები დგას დღეს სასწორზე. სწორედ ამიტომ არის 26 ოქტომბერი დამოუკიდებლობის მეორე რეფერენდუმი. სწორედ ამიტომ, ხელახლა უნდა მოვუხმოთ სიბრძნეს და სამშვიდობოს გავიყვანოთ საქართველო“, – განაცხადა შალვა პაპუაშვილმა.