უამინდობით გამოწვეული პრობლემები

16 თებერვალი 2017, 00:00 1985 ნახვა

ელექტროენერგიის გარეშე დარჩენილი 500-მდე აბონენტი, ქარბუქი და შეზღუდვები გზებზე. ხულოში ისევ თოვს. თოვლის საფარმა დაბაში  1 მეტრს, ხოლო მაღალი ზონის სოფლებში 2 მეტრს გადააჭარბა. უამინდობის გამო შეფერხებებია  სოფლების: დიდი რიყეთის, კორტოხისა და ბოძაურის მიმართულებით. გზები 5 მიმართულებით იწმინდება. დააზიანებულია  ელექტროგადამცემი ბოძები, რის გამოც საციხურის, დიდაჭარის და სხალთის ადმინისტარაციულ ერთეულებში შემავალ  რამდენიმე სოფელს შუქი არ მიეწოდება. 13 საბავშვო ბაღიდან 5 საბავშვო ბაღში სასწავლო პროცესი არ განახლებულა. გამგეობაში მუშაობს  24 საათიანი საგანგებო შტაბი. 


თოვს შუახევშიც. არსებობს ზვავის ჩამოწოლის საშიშროება. ბათუმი-ახალციხის საავტომობილო გზის შუახევის მონაკვეთზე ტრანსპორტით გადაადგილება თავისუფალია. მაღალი ზონის სოფლებში მოძრაობა შეზღუდულია. შუქი დილიდან არ მოიწოდება წყალსაყრის, ბარათაულისა და ნაწილობრივ ჭვანის ადმინისტრაციული ერთეულების სოფლებს. სასწავლო პროცესი აქ არ შეფერხებულა. თუმცა აღსაზრდელების გამოუცხადებლობის გამო სააღმზრდელო პროცესი  შეწყვეტილია 2 საბავშვო ბაღში. 


ქედაში უამინდობის გამო შვიდ საბავშვო ბაღში სასწავლო პროცესი ჩაიშალა.  ბაგა- ბაღების გაერთიანებაში აცხადებენ,  რომ მიზეზი აღსაზრდელების გამოუცხადებლობაა. უხვმა ნალექმა დააზიანა ელექტროგადამცემი ხაზები.  ამ დროისთვის ელექტროენერგია არ მიეწოდება სოფელ კოკოტაურის მოსახლეობას. ტრანსპორტის  გადაადგილება შეზღუდულია შიდა სასოფო გზებზე.  საგზაო დეპარტამენტის ინფორმაციით,  დილიდან  მიმდინარეობს გაწმენდითი სამუშაოები. თოვლის საფარი ქედაში 50 სანტიმეტრს აღწევს.

ამავე კატეგორიაში