კორონავირუსის 14 ახალი შემთხვევა და კიდევ 44 გამოჯანმრთელებული

11 აგვისტო 2020, 11:01 1301 ნახვა

საქართველოში კორონავირუსის 14 ახალი შემთხვევა გამოვლინდა.  2 პაციენტი გაჩიანიდანაა, 9 დადასტურებული შემთხვევების კონტაქტია, 3 კი იმპორტირებულია.  

გამოჯანმრთელდა 44 ადამიანი.  თბილისის ინფექციური საავადმყოფოს კლინიკური დირექტორის მარინა ეზუგბაიას განცხადებით, საქართველოში კორონავირუსისგან გამოჯანმრთელებული 44 პირიდან უმეტესობა ავღანეთიდან ჩამოყვანილი ქართველი სამხედროები არიან. ერთი კოვიდინფიცირებული  გამოჯანმრთელდა ბათუმის რესპუბლიკურ საავადმყოფოში, პაციენტი კლინიკაში 3 კვირის განმავლობაში მკურნალობდა.

ბათუმში ამ დროისთვის 17 კოვიდ დადებითი პაციენტი მკურნალობს, მათგან ერთი  საშუალო სიმძიმისაა, 16-ის ჯანმრთელობის მდგომარეობა კი დამაკმაყოფილებელია.

საავადმყოფოში დღეს კიდევ ერთი პაციენტის გამოჯანმრთელებას ელოდებიან, რომლის საკონტროლო ტესტირებამ გუშინ ვირუსი არ აჩვენა, განმეორებითი პასუხი კი დღის ბოლოს იქნება,ორჯერადად უარყოფითი  შედეგის შემთხვევაში პაციენტი კლინიკას დატოვებს. 

სოფიკო მაკარაძე
ჟურნალისტი

ამავე კატეგორიაში