p.s-ის გუნდმა ''რუსთავი 2'' დატოვა

22 აგვისტო 2019, 15:01 495 ნახვა

ტელეკომპანია ''რუსთავი 2''-ის გადაცემა p.s.-ის გუნდმა არხი დატოვა. ამის შესახებ ფეისბუქის ოფიციალურ გვერდზე განცხადება გაავრცელეს. 

''სარედაქციო დამოუკიდებლობასთან ერთად, ერთიანობა და გუნდურობა ჩვენთვის გადამწყვეტია. ამიტომ ერთობლივად მივიღეთ მტკივნეული გადაწყვეტილება, დავუტოვოთ ბიძინა ივანიშვილს ჩვენი ხელით ნაშენები დაცარიელებული ტელევიზია და გუნდისგან დაცლილი „პოსტსკრიპტუმი“ - მხოლოდ ლოგო და მხოლოდ სახელი - იმისთვის, რომ ისევ ერთად გავაგრძელოთ იმავე საქმის კეთება'' - ნათქვამია განცხადებაში. 

p.s-ის გუნდის წევრები განცხადებაში წერენ, რომ გადაცემის წამყვანის გაუფრთხილებლად გაათავისუფლეს. ეს გადაწყვეტილება კი მათ არჩევანს აღარ უტოვებთ.

„რუსთავი 2“-ის 25-წლიან ისტორიასთან ერთად დასრულდა საქართველოს ყველაზე ხანგრძლივი ისტორიის მქონე ანალიტიკური გადაცემა „პოსტსკრიპტუმიც“. სატელევიზიო ფორმატი, რომელსაც ამ წლების განმავლობაში არ დაუკარგავს უმაღლესი რეიტინგი და მაყურებელი. პირველიდან უკანასკნელ დღემდე ჩვენ ვირჩევდით საზოგადოებისთვის ყველაზე საინტერესო თემებსა და მოვლენებს, გიყვებოდით არა მხოლოდ იმას, რა მოხდა, არამედ იმას, რატომ მოხდა, როგორ მოხდა და რა გაგრძელება ექნებოდა. საქართველოს უახლესი ისტორია იწერებოდა გადაცემით, რომელსაც მაყურებელი ყოველ კვირას, 9 საათზე ელოდა და რომელსაც ამ ქვეყნის ყველაზე გამოცდილ და ნაბრძოლ ჟურნალისტთა და ოპერატორთა პატარა გუნდი ამზადებდა.

რამდენიმე დღის წინ სრულიად გაუფრხილებლად მოგვიხსნეს საავტორო გადაცემის წამყვანი და ასევე საინფორმაციო სამსახურის უფროსი, რის შესახებაც მხოლოდ პირდაპირი ეთერით გავიგეთ. ეს გადაწყვეტილება აღარ გვიტოვებს არჩევანს - მრავალჯერადი დაპირების მიუხედავად, წაგვერთვა შესაძლებლობა ვაკეთოთ ისეთი გადაცემა, როგორსაც ვაკეთებდით და ვთქვათ ის, რასაც ვთვლით საჭიროდ.

ჩვენს მაყურებელს არ ეღალატება.

არ გემშვიდობებით!

გვინდა გითხრათ - ნახვამდის. ნახვამდის და მომავალ შეხვედრამდე!

სულ მალე!'' - წერია განცხადებაში. 

''რუსთავი 2'' გუშინ კურიერის ჟურნალისტების ნაწილმაც დატოვა. 

ზაირა ლომაძე
ჟურნალისტი

ამავე კატეგორიაში